Chimen Libète

Chimen Libète

M sonje janm pat anyen, janm te tankou tchoul kay wa

M pa bliye jan yo tap maltretem men mwen te san vwa

M patka pale, se te kriye, jemi, sibi paskem pat gen dwa

Men sou do yo m tap monte plan m, trase vèvè, rele lwa

Se tankoum pat egziste, sèl sam te posede se te karaktè

Pom rèd tèlman m aprann reziste fas a woulo konpresè

Moun parèy mwen ki bati richès yo sou soufrans mwen

Moun ki wèm lèd pandan m fè wè yo bèl ak kouraj mwen

Yo kanpe bò kotem, ak tèt yo bese yap fòse gadem ba

Men pisans mwen pi wo pasem, sou yo map taye banda

Siw wè m nwè se paske lòt koulè po patka sipòte botem

Yo eseye kokobe m men l te twò ta, tout latè pran kotem

Nan yon bat je yo te nan fènwa, koulè nwa m ta pral klere

Ay, yo pran kou! Yo te bliye bay kou bliye pote mak sonje

Ah! M mache sou yo, mache vanje mounite m yo te vyole

Yo estomake! men sa patka anpeche libète gaye tout kote

Ou twouve se yon bèl tèks? Klike sou ekriti ble anba a pouw al abone a paj facebook nou an pouw rete konekte ak nou⬇

Paj FB nou

Mèsi pou sipò w!